Siyəzən rayon müəllimlərinin konfransı keçirilmişdir.
Bu gün Siyəzən şəhər Mədəniyyət Mərkəzində rayon müəllimlərinin ənənəvi sentyabr konfransı keçirilmişdir. Konfransda “2014-2015-ci dərs ilinin yekunları və yeni dərs ilində qarşıda duran vəzifələr” mövzusunda məsələ müzakirə edilmişdir. Tədbirdə ilk olaraq Rayon Təhsil şöbəsinin müdiri Rəfail Hacıyev geniş məruzə ilə çıxış etmişdir. Qeyd edilmişdir ki, əsası ulu öndər Heydər Əliyev tərəfindən qoyulmuş və möhtərəm Prezidentimiz cənab İlham Əliyev tərəfindən davam etdirilən təhsil islahatları bütün respublikamızda olduğu kimi Siyəzən rayonunda da uğurla davam etdirilir. 2014-2015-ci dərs ilində Siyəzən rayonunun ümumtəhsil məktəblərində 5779 nəfər şagird təhsil almış, onların təlim-tərbiyəsi ilə 720 nəfər müəllim məşğul olmuşdur. 2015-ci ildə 20 nəfər gənc müəllim Təhsil Nazirliyində imtahan verərək rayonun müxtəlif məktəblərində öz ixtisasları üzrə işləmək hüququ qazanmışlar. Siyəzən şəhər 6 saylı tam orta məktəbin müəllimi Tatyana Səlimova Prezidentin sərəncamı ilə “Əməkdar Müəllim” adına layiq görülmüş, Siyəzən şəhər 1 saylı tam orta məktəbi “Ən yaxşı ümumtəhsil məktəbi” və Siyəzən şəhər 2 saylı tam orta məktəbin riyaziyyat müəllimi Aynurə Dadaşova “Ən yaxşı müəllim” müsabiqəsinin qalibi olmuşdur.
Konfransda buraxılış və qəbul imtahanlarının nəticələri haqqında geniş müqayisəli məlumat verilmişdir. Qeyd olunmuşdur ki, buraxılış imtahanlarının nəticəsindən asılı olmayaraq ölkə başçısnın göstərişi ilə bütün IX və XI sinif məzunlarına təhsil sənədləri - ümumi orta təhsil haqqında şəhadətnamə və tam orta təhsil haqqında attestat verilmişdir. XI sinfi bitirmiş 369 nəfər məzundan 250 nəfər qəbul imtahanlarında iştirak etmiş, onlardan 94 nəfəri ali məktəblərə daxil olmuşdur. Bundan əlavə 3 nəfər hərbi yönümlü ali təhsil ocaqlarının, 6 nəfər isə xarici ölkələrin ali məktəblərinin tələbələri olmuşlar. Əvvəlki illərin məzunlarından 12 nəfər də bu ildən tələbəlik sevinci yaşayırlar. 23 nəfər orta-ixtisas məktəblərinə qəbul olunmuşdur ki, onlardan 20 nəfəri 2015-ci ilin məzunlarıdır. Tələbə adını qazanmış məzunlardan 11 nəfər 500-dən artıq bal toplamışdır. Onlardan 6 nəfəri 600-dən yuxarı bal toplamışdır. Siyəzən şəhər 1 saylı tam orta məktəbin şagirdləri Umud Hüseynov 660 bal, Ramilə Dadaşova 630 bal, Siyəzən şəhər 2 saylı tam orta məktəbin şagirdləri Jalə Cəbiyeva 675, Abdulla Abdullayev 643 bal və Fidan Əsgərova 603 bal, Yenikənd kənd tam orta məktəbin şagirdi Gülzada Mirzəməmmədova isə 659 balla yüksək göstəriciyə nail olmuşlar. Konfransda həmin məzunlara Fəxrı Fərman və pul mükafatları verilmişdir. Rayon məktəblərinin 8 müəlliminə də Siyəzən rayon Təhsil şöbəsinin Fəxrı Fərmanları təqdim olunmuşdur.
Konfransda Siyəzən şəhər 1 sayli tam orta məktəbin direktoru Nəcməddin Mürvətov, gənc müəllim Tamerlan Qurbanov, məzun Abdulla Abdullayev çıxış edərək təhsilimizə göstərilən dövlət qayğısından, əldə olunmuş nailiyyətlərdən danışmış, bütün pedaqoji ictimaiyyəti, xüsusilə şagirdlərin yüksək göstəricilər qazanmasında əməyi olan müəllimləri təbrik etmiş, onlara xoş arzularını bildirmişlər.
Konfransda iştirak edən Azərbaycan Respublikası Təhsil Nazirliyinin nümayəndəsi Faiq Şahbazov hazırda respublikamızda təhsil sahəsində aparılan genişmiqyaslı işlər, qəbul imtahanlarının gələcəkdə aparılması qaydalarında mümkün ola biləcək yeniliklər, regionlarda müəllimlərin sınaq qiymətləndirilməsinə hazırlıq işlərinin aparılması, hesabatların yeni qəbulu sistemi, təhsilin inkişafı üzrə Dövlət Strategiyasının həyata keçirilməsi məsələləri, dərslik siyasəti və bir sıra digər məsələlər haqqında geniş məlumat vermişdir.
Siyəzən Rayon Icra Hakimiyyətinin başçısı cənab Arif Qasımov rayon müəllimlərini yeni dərs ili münasibəti ilə təbrik edərək bildirmişdir ki, müəllimlərə, xüsusilə gənc müəllimlərə hər cür qayğı göstərmək hər bir aidiyyəti şəxsin borcudur. O həm gənc müəllimlərə, həm də ehtiyacı olan tələbə və şagirdlərə daim diqqət göstəriləcəyini qeyd etmişdir.
Konfrans iştirakçıları adından Azərbaycan Respublikasının Prezidenti cənab İlham Əliyevə müraciət qəbul edilmişdir.
